Power

Taaqat k dewata aj
Yun begane hue hain
Kapre noch liye hon jaise
Lekin jild utar pehne gai
In sab logon ki
Jo behangam nashe se bahir hain
Khaal utar pehne gai
Gharib ke jhulaste badan ki
Kisi yetim ki, kisi faqir ki
Kisi bebas ke zamir ki
Taaqat k dewata aj
Phir se thikane lage hain
Phir se begane hue hain
Aur hum
Matti k peshwa
Aise he dewane hue hain

Advertisements

93

Tanhayon mai rehne ki adat hai
Zanjeerain sehne ki adat hai
Haqiqat hai ye-
K taqdeerain sehne ki adat hai
Jo pardon mai chupa hai
Dunya walon ko,
Us pardai he ko cheer daine ki adat hai
Jaam pee k humko isi liye–
Gehrai mai rehne ki adat hai
Wo pakeezgi dhunte hain
Phir humain jhinjorte hain
Lekin humko tau bebaaki mai reh kar–
Karwa zehar peenai ki adat hai
Jo gumnaam shehar abaad thai
Bas wahin tamashe ki adat hai
Khuda ko dekh lia hai humne
Tabhi tau usko yaar kehne ki adat hai
Majbur hogaye thai hum
Tabhi tau zinda ho K bhi,
Marjane ki adat hai
Roza’e ashqui pe jab bhi jana hua
Tau sulagne ki adat hai
Jab sab fanaa hota hai
Tau khush hone ki adat hai
Wo pathar ban gaye thai sab log
Tabhi gharib ko bebasi ki adat hai
Lagaam do, bus bohat hua!
Isi liye qaide aur asoolon ki adat pe
Majbur hone ki adat hai

Raqeeb

Qismat Kai raqeeb
Sab bas gaye ik shehar mai
Jahan chandi mela hota tha
Aur andherei ka pehra hota tha
Par hawain khub chalti thien
Jaise paigham lati houn
Dusre paar se kisi thehrao ka
Dhalta Suraj bas dhalta rehta
Aur chand ko zang lag gaya tha
Par sitare khud roshan thai
Jaise shamyane khud roshan houn
Sham hoti ya raat hoti
Wo qismat Kai raqeeb
Mehfil se bach kar, konon Mai ja chupte thai
Hum jante thai sab raste
Sab deewaron se mulaqat thi
Sab andhero ka pata tha
Ik raqeeb tha uska, dusra mera chehra

Bezubaan Zanjeerain

Zanjeerain insan ko hamesha qaid nahi kia kartien. Aksar insan zanjeeron ki qaid mai ajata hai. Aur in dono mai fark hai. Jo zanjeerain insan ko qaid karti hain–wo bezabaan nahi hotien. Wo shor machane wali aur zulm ki zubaan bolne wali hoti hain. Magar wo jin mai insan qaid hojata hai–wo aksar khamosh hoti hain. Wo bezubaan hoti hain. Kyunk insan unko apni bebassi k shor mai ahista ahista khatam kr deta hai.

Ye sab batain shayad har kisi ko samajh na ayen. Aur shayad kisi ko bhi samajh mai na ayen. Shayad is sab ka koi maqsad nahi. Akhir kabhi zanjeeron ki bhi zubaan hua karti hai. Aur insan aise he in mai qaid nahi ho jata. Ye sab tau tasawur hai. Magar tasawur mai he wujud hai. Aur wujud mai ikhtilaaf. Ikhtilaaf hai tau zanjeerain hain. Par shayd ye batain kisi ko bhi samajh na ayen. Shayad in ka koi sira he nahi.

Khamoshi bzubaan hoti hai. Insan kabhi khamosh nahi hosakta. Hata k wo chup bhi ho–tab bhi khamosh nahi hota. Magar ye pathar par lakeer nahi. Tau ye bezubaan zanjeerain kia hain? Jin ki girift mai qaid ho k insan bilatakaluf ho jata hai aur ye khud khamosh? Soch?

Soch ki qaid mai kia kia zulm nahi hota. Aur iski qaid mai kia kia barkat aur kia lutf aur kia maza hai. Aur iski qaid mai zindagi ka aina hai. Magar ye bezubaan tau nahi? Aur ye bezubaan hai.

Andhera? Andherai ki qaid mai kia sukh hain? Nafs? Husn? Ishq? Dard? Khushi? Zindagi?

Konsi zanjeer? Konsai alfaaz? Konsay khayal? Aur konsi zubaan? Aur qaid!

Darasal sab maya he tau hai.

Aur aik bezubaan zanjeer insan khud hai.

Shayad is baat ka koi jawaz nahi. Aur shayad is k baraqs.8560 (1)